EL DJOGO DE KARTAS ANDE LOS ANUSIM

El tema de los anusim, los desendientes de los djudios de Espanya i Portugal ke fueron ovligados a konvertirsen ma bushkaron a kedar fideles a sus relijion, esta tomando un lugar kada dia mas importante i kada nada se estan deskuvriendo uzos, tradisiones i otros sinyos mas ke konfirman la importansia de este kapitolo de la istoria djudia.

Entre otras mos yego ultimamente informasion, en un artikolo del Sr Art Benveniste en el boletin elektroniko "eSefarad", sovre un uzo muy kuriozo de algunos bene anusim.

El konta en este artikolo sovre el testimonio de una mujer en el norte de Nuevo Mexico, ke kada mez de Septembre uzava djugar kartas kon su avuela. Este testimonio, adjusto el, le akodro algo ke le fue kontado por el rabino Baruh Garzon de Madrid ke, anyos atras, avia ido a Barcelona, a nombre de la komunidad djudia de Espanya, afin de tratar de la merkida de un terreno para un kampamiento de enverano. A la fin de las negosiasiones ke tuvo kon el proprietario de este terreno fue desidido ke el tornaria a Madrid, para avlar kon el komite de direktores de la komunidad, i vendria a la semana viniente para firmar los dokumentos.

Al tornar a Madrid, Garzon resivio una yamada telefonika del proprietario diziendole ke avia siertos dias en la semana viniente en los kuales no podria firmar los dokumentos. Kuando el rabino noto estas datas en su ajenda, el se dio kuenta ke eyas koinsidian kon las Altas Fiestas djudias. Yamo a Barcelona i demando ke era la razon ke el proprietario no podria firmar en estas datas. Le fue eksplikado ke su famiya tenia un uzo estranyo, ke en siertos dias en el anyo no lavoravan ni tokavan dinero. El rabino Garzon demando ke azia la famiya en estos dias? La repuesta fue: "djugavan kartas".

El proprietaro no tenia dinguna eksplikasion a este uzo ma segun el rabino Garzon esta es una tradision ke data de la epoka de la Inkizision, kuando los djudios sekretos se reunian en las fiestas djudias para azer sus orasiones, asentados al deredor de una meza sovre la kuala avia kartas, mientres ke los livros de orasion estavan sovre sus piernas, debasho de la meza. Esto era echo naturalmente para el kavzo ke vengan ayi personas ajenas, afin de azerles kreer ke estavan djugando kartas i no aziendo orasiones djudias.

Una informasion muy interesante a este sujeto fue embiada por una mujer de Nuevo Mexico sigun la kuala el djogo de kartas es yamado ayi "Barajas" (pronunsiado "Barahas"), lo ke sigun la Akademia Ebraika de Albuquerque puede relasionarse kon la palavra "Braha", orasion en ebreo.

Otra informasion mos viene de una mujer de Mexico ke deskuvrio eya tambien algunas kostumbres familiales de anusim, i entre otras la de djugar kartas las noches de Shabat. Kuando, anyos atras, soldados meksikanos azian inspeksiones en las kazas, los viernes a la noche, afin de asegurarsen ke dinguno no estava observando el Shabat, los anusim djugavan a las kartas sovre un mantel estirado ensima de la meza.

Ayi tambien, de mizmo ke onde los anusim de Espanya, el djogo de kartas tenia por buto de permeter a los anusim de azer sus orasiones sin ser deskuviertos por los adjentes de la Inkizision.

Oy la mayoria de los desendientes de estos anusim ya no se akodran mas de las orasiones djudias ke azian sus avuelos, siglos atras, ma munchos de eyos guadran ainda siertas tradisiones, komo el djogo de kartas en los dias de shabat i en las fiestas djudias, ke estan siendo rekonosidas komo klaros sinyos de sus atadijos kon el puevlo djudio.

Las ultimas investigasiones echas en los archivos de la Inkizion, en Espanya i otros paizes iberoamerikanos, ansi ke los testimonios de numerozos anusim i sus desendientes ya trusheron a muestra konosensia una larga lista de tradisiones, uzos i kostumbres ke permetieron a los anusim de mantener sus identidad durante largos anyos, i en siertos kavzos asta muestros dias. Trayemos aki, para kompletar este artikolo, una lista de algunos de estos uzos i tradisiones: No komer karne de puerko i no gizar mesklando karne kon leche, kon el preteksto ke esto no es bueno para sus salud.
Vistir ropa limpia, viernes a la tadre, para resivir el shabat. Ensender kandelas, tadre de shabat, ma eskonderlas en un lugar onde no puedan ser vistas por ajenos, komo en almarios. No lavorar en dia de shabat – i si esto puede kavzar problemas, avrir las butikas ma topar pretekstos para no vender nada http://www.aki-yerushalayim.co.il/ay/088/088_02_el_djogo.htm